Shpallje

Në kuadrin e Trilateralit të Adriatikut, ministri për Evropën dhe Punët e Jashtme Ditmir Bushati mori pjesë në Takimin e tretë të Ministrave të Punëve të Jashtme të Shqipërisë, Malit të Zi dhe Kroacisë, që u mbajt sot në Budva.

Kjo platformë e lançuar vitin e kaluar i shërben përpjekjeve të përbashkëta për konsolidimin e bashkëpunimit në Evropën Adriatike, tashmë të shndërruar edhe në NATO-n Adriatike, dhe për një aksion të përbashkët në interes të një rajoni më të siguritë dhe më të ndërlidhur në të gjitha dimensionet.

Gjatë takimit tre ministrat e Jashtëm u fokusuan në bilancin e Samitit të NATO-s në Bruksel, Samitit të BE dhe Ballkanit Perëndimor në Londër në kuadrin e Procesit të Berlinit, përmirësimin e ndërlidhjes dhe transportit në rajon, si dhe nxitjes së bashkëpunimit në fushën e turizmit dhe mbrojtjes së ambientit.

Në fjalën e tij ministri Bushati theksoi rëndësinë e bashkëpunimit mes tre vendeve në proceset e integrimit dhe kthimin e këtij rajoni nga një hapësirë sigurie në një hapësirë zhvillimore.

Për ministrin Bushati “procesi i zgjerimit nuk mund të zhvillohet në vakum, duhet të shoqërohet me instrumente që i shërbejnë dhe procesit të rimëkëmbjes së ekonomisë dhe transformimit politik dhe shoqëror të vendeve të Ballkanit Perëndimor”.

Në përfundim të takimit, ministrat e Jashtëm të të tre vendeve nënshkruan një Deklaratë të Përbashkët.