Shpallje

Nga Edjon Maliqi/
Kur bie fjala për turizmin në Shqipëri kam përshtypjen se të gjithe jemi dakord që ky dimension i ekonomisë në vendin tonë ka pësuar rritje në tre vitet e fundit. Sigurisht që kjo ka ndikuar në rritjen e ekonomisë së vendit, edhe pse duke e paralizuar me fushat e tjera kjo rritje bëhet e papërfillshme. Megjithatë edhe këtu ka probleme dhe mangësi, të cilat unë personalisht i kam hasur në terren për një kohë relativisht të gjatë ku kam kryer disa matje të miat, të para në optikën time personale dhe disi subjektive.

Disa nga problemet më kryesore dhe më shqetësuese për turistët e huaj janë rrrugët jo të mira dhe mungesa e theksuar e sinjalistikës rrugore e cila konsiderohet nga ata si një rrezik goxha i madh për jetët e tyre. Ne të gjithë jemi të vetëdijshëm se numri i lartë i aksidenteve të regjistruara muajt e fundit nuk është vetëm pasojë e papërgjegjshmërisë individuale, më tepër se aq është mungesa e harmonisë së vendosur mes sinjalistikës rrugore, strukturave të policisë rrugore dhe sigurisht individit që drejton mjetin.

Cilësia e dobët e shërbimit në strukturat hoteliere është një tjetër faktor që e pengon zhvillimin e turizmit. Shpesh kjo vjen si rrjedhojë e stafit të pakualifikuar si dhe mungesës së trajnimeve përkatëse. Nga eksperinca ime kam mësuar se për turistët e huaj më i rëndësishëm se akomodimi në një hotel luksoz është komunikimi i vendosur me personat përreth. Në këtë drejtim dua të theksoj edhe mungesën e politikave sociale që e orientojnë të riun shqiptar drejt zhvillimit të aftësive në fushën e turizmit.

Një tjetër problem me rëndësi të madhe është edhe mjedisi, të cilin ne duhet ta servirim në mënyrën më të mirë të mundshme. Ne jemi një nga të paktët vende me 4 stinë të plota dhe 365 ditë diell, një vijë të përsosur bregdetare dhe alpe të mrekullueshme… Shpesh ndodh që në atraksjonet më të frekuentuara turistike ne të gjejmë abuzimi me natyrën, dhe kjo është një padrejtësi që ne i bëjmë jo vetëm natyrës dhe vetes, por të gjithë shoqërisë!