Shpallje

Fundi i vitit nuk do të jetë i qetë për socialistët. Në prag të Krishtlindjeve, socialistët do të mbledhin sot kryesinë për të analizuar thellësisht punën e qeverisë në këtë vit të parë të mandatit të dytë qeverisës, duke konsideruar dhe protestën e studentëve që kryeministri e cilësoi një shuplakë. Po ashtu në 28 dhjetor, do të mblidhet dhe Asambleja e partisë ku shpesh Rama ka kritikuar ashpër drejtuesit e të gjitha niveleve për shkëputje nga problemet e njerëzve.
Partia Socialiste ka mbledhur paraditen e kësaj të hëne (24 dhjetor) Kryesinë, që i paraprin dhe mbledhjes së Asamblesë me 28 dhjetor.
Në këto mbledhje socialistët do të diskutojnë për qeverisjen e këtij 1 viti në mandatin e dytë si dhe për organizimin për sa i përket zgjedhjeve lokale që janë në horizont.
Kjo mbledhje vjen pas protestës 17 ditore të studentëve dhe do të jetë një mundësi për reflektim të politikave që kanë shkuar keq.
Nuk përjashtohen as ndryshimet në qeveri duke qenë se vetë kryeministri dhe drejtues të lartë të Partisë Socialiste janë shprehur se nga kjo situatë do të nxirren përgjegjësit.