Shpallje

Nga Refxhei Tola

Jo shokuese, as monstruoze, ngjarja e transmetuar ditën e djeshme ishte çnjerëzore nga fillimi deri në fund! 

Nuk di çfarë ishte më e frikshme në këtë histori, babai që përdhunonte vajzën për tre vite rresht, nëna që e pranonte si të mirëqenë dhe ishte mjaft e gatshme ta linte pas për të mbrojtur rehatinë e saj, oficeri i policisë që kishte kërcënuar vajzën pasi ajo e kishte denoncuar babain monstër, apo Kodi ynë Penal, që parashikon në maksimumin e tij 7 vite burg dhe një sërë lehtësirash për këtë krim që meriton shumë më shumë ndëshkim!  Nuk jam e sigurt, se më shumë se sa kaq është e frikshme vetmia dhe indiferenca e të gjitha atyre mësueseve që nuk mundën të zbulonin traumën morale që një vajzë 18-vjecare po jetonte për tre vite. Indiferenca e psikologut të shkollës ku ajo studionte, shërbimit social apo njerëzve që e rrethonin…

Ah moj Shqipëri e mjera Shqipëri! Shoqëria jonë na provoi dje se ku ka degraduar morali, njerëzorja, ku ka degraduar nderi dhe besa e shqiptarit! 

Ajo vajzë dje, me një kurajë të jashtëzakonshme, na tregoi të gjithëve se cfarë i kemi bërë shoqërisë sonë duke heshtur! Po duke heshtur! Duke heshtur ndaj dhunës, duke heshtur ndaj këtyre palo-ligjeve dhe ndaj indiferencës së njëri tjetrit! 

Ajo vajzë dje na dha të gjithëve ne një shuplakë të fortë, për të gjitha ditët dhe herët kur ne qëndruam indiferentë kur vajzat gratë dhe nënat tona u përdhunuan, mendërisht, fizikisht, shpirtërisht! 

Sot gratë shqiptare nuk janë të sigurta! Sot shteti nuk u jep viktimave të dhunës seksuale, as besimin minimal për të ngritur zërin e tyre… Sot duhet të flitej për këtë vajzë më shumë se për votimet, më shumë se për politikanët, sot duhet të arrestohej edhe nëna e saj që mbuloi me një pafytyrësi çnjerëzore krimin e burrit të saj, duhet të arrestohej edhe oficeri që i kishte bërë presion dhe e kishte kërcënuar! Sot Ministri i Brendshëm i kishte borxh të gjitha vajzave, grave, nënave shqiptare një FALJE në emër të një institucioni që nuk ja dha dot kurrë forcën viktimave të krimit të marrin kurajë për ti thënë ndal dhunës dhe përdhunimit!