Zëdhënësja e BE-së, Maja Kocijancic, ka komentuar takimin e djeshëm në Ohër mes liderëve ballkanikë, duke u shprehur se këto iniciativa për rritjen e bashkëpunimit rajonal janë të mirëseardhura.

Në një prononcim për Gazetën Express, ajo thotë se në mbledhje duhet të jenë të përfshira të gjitha shtetet e Ballkanit Perëndimor. Kjo sipas saj, që nisma të jetë në përputhje me të gjitha rregullat e BE-së.

“Është e rëndësishme që nisma rajonale të përfshijnë të gjitha partnerët në Ballkanin Perëndimor, dhe të jenë në përputhje me rregullat e Bashkimit Evropian, duke u bazuar gjithmonë në angazhimet e marra më herët”, u shpreh ajo.

Kocijancic deklaroi se bashkëpunimi regjional është një element esencial për perspektivën evropiane, të Ballkanit Perëndimor.

Ajo shtoi se BE mirëpret faktin se në përfundimet e Samitit të mbajtur në Ohër, thuhet se masat që do të dalin nga kjo nismë rajonale nuk do të zëvendësojnë asnjë dhe do të respektojnë të gjitha angazhimet e marra nga marrëveshjet ekzistuese. Siç është marrëveshja e CEFTA-s e Traktatin E komunitetit të Transportit.

SPONZORIZIM: Për shpallje të vogla që nga viti 2000, vizitoni www.SHPALLJE.biz