Kryeministri i ardhshëm i Kosovës, Albin Kurti ka zhvilluar një takim me Komisionerin për Politika të Fqinjësisë dhe Negociatat për Zgjerim, Johannes Hahn.

Kurti përmes një statusi në rrjetin social Facebook, thekson se dialogu i Kosovës me Serbinë ka qenë një nga temat e prekura në këtë takim

“Sot, në Komisionin Evropian në Bruksel, takova Komisionerin për Politika të Fqinjësisë dhe Negociatat për Zgjerim, z. Johannes Hahn. Një takim tjetër pata edhe me Zëvendës Drejtoren Menaxhuese për Evropë perëndimore, Ballkanin perëndimor dhe Turqinë në European External Action Service, znj. Angelina Eichhorst”, ka shkruar Kurti.

Ai ka theksuar se ndër të tjera është biseduar edhe për perspektivën e dialogut me Serbinë.

“Biseduam për bashkëpunimin ndërmjet Kosovës dhe BE-së, sfidat e qeverisjes sonë të ardhshme sidomos për drejtësi e punësim, raportet e shteteve në Ballkan si dhe për perspektivën e dialogut me Serbinë”, shkruan Kurti ndër të tjera. .