Një ditë më parë, kreu i shtetit, Ilir Meta deklaroi se do të kallëzonte penalisht, kreun e Këshillit të Emërimeve në Drejtësi, Ardian Dvorani.

Meta argumentoi se padia kundër Dvoranit do të bëhet për shkak se sipas tij, kreu i KED-së ka shpërdoruar detyrën.

Por kjo nuk është padia e parë kundër Ardian Dvoranit. Kujtojmë se para dy vitesh, ishte Partia Demokratike ajo që kallëzoi penalisht kryetarin e KED-së.

Në këtë padi, Dvorani akuzohet për “Kryerje të funksionit pas dhënies fund të tij”, të parashikuara nga neni 249 i Kodit Penal.

Siç thuhet në kallëzim, Dvorani, të cilit i mbaronte mandati në 17 shkurt të vitit 2014 si anëtar i Gjykatës së Lartë, duke shfrytëzuar një përcaktim të bërë në nenin 5 të ligjit organik të Gjykatës së Lartë, vijoi të qëndronte në detyrë përtej mandatit kushtetues.

“Konkretisht, me ligjin nr. 151/2013, datë 30.5.2013 ‘Për disa ndryshime dhe shtesa në ligjin nr. 8588, datë 15.3.2000 ‘Për organizimin dhe funksionimin e Gjykatës së Lartë të Republikës së Shqipërisë’, i cili ka hyrë në fuqi më datë 1 Tetor 2013, pika 3 e nenit 5 u ndryshua si më poshtë vijon: ‘Gjyqtari, të cilit i ka përfunduar mandati apo i ka mbaruar mandati, sipas shkronjës ‘c’ të nenit 139 të Kushtetutës, vazhdon të ushtrojë detyrën deri në emërimin e gjyqtarit pasardhës’. Në këto kushte, gjyqtari Ardian Dvorani, ndryshe nga kolegë të tij, preferojë të zbatojë ligjin dhe jo Kushtetutën”, thuhet në kallëzimin e dy viteve më parë nga PD.

SPONZORIZIM: Për shpallje të vogla që nga viti 2000, vizitoni www.SHPALLJE.biz