Pak pasi ambasada amerikane propozoi që për ngërçin e krijuar për Gjykatën Kushtetuese duhet ti drejtohemi Komisionit të Venecias, ka ardhur edhe reagim nga Presidenca.
Në një postim në rrjetin social, zëdhënësi i Presidentit të Republikës, Tedi Blushi thekson se garantët e veprimeve të paligjshme dhe mafioze të kreut të KED-së, Ardian Dvoranit e kanë marrë mbrëmë përgjigjen zyrtare në një bisedë zyrtare tepër të përgjegjshme të kreut të shtetit.
Kreu i Shtetit, Ilir Meta, i është përgjigjur edhe ambasadorit italian në Shqipëri, Alebrto Cutillo, i cili ka bërë të njëjtin propozim me ambasadën amerikane. Zëdhënësi i Presidentit, Tedi Blushi, e cilëson ambasadorin italian si “ambasadori i Agaçit”.
Reagimi i Tedi Blushit:
Garantët e veprimeve të paligjshme dhe mafioze të Dvoranit e kanë marrë mbrëmë përgjigjen zyrtare në një bisedë zyrtare tepër të përgjegjshme të Kryetarit të Shtetit.
Tymi i Venecias që hodhi me porosi të Ramës, Ambasadori në ikje i Agaçit pak ditë më parë, është turpi më i fundit i grupit të strukturuar diplomatik në Tiranë, bashkëfajtor për dhunimin sistematik të Reformës në Drejtesi dhe me qëllim kapjen e saj të plotë nga Regjimi monist i Edi Ramës.
Mjaft më “Rule of Embassy”. Është koha për “Rule of Law” si çdo vend demokratik. Rruga e Elbasanit të çon në Elbasan dhe Rama e përdor dhe për në Xibrakë! Rruga e Kavajës të çon në Kavajë! Vetëm rruga e Kushtetutës na çon në Europën e Bashkuar!
